..شاع الخبر عند اهل الدوار الكل..اللي سبتي ولد المجيره حي يرزق لباس عليه ويخدم في تونس وامورو عال العال..وبدات الناس تتوافد على دار والد السبتي تهني فيه وتباركلو على سلامة ولدو.. بعد ما انقطعت اخبارو وحسبوه مات من وقت اللي خرج من الدوار. وقالهم هاني خارج وخليتهالكم واسعه وعريضة.. ماعادش انجم انعيش معاكم..ما عنديش صدر حنين..والناس الكل فرحانه بالخبر السعيد.رغم اللي سبتي ماكانوش يحبوه برشه ويعتبروه باندي.. وقداش من مره اتهموه بحاجات موش باهية حتى انهم وصلو اتهموه بالسرقه. وفي مره من المرات اتهمو احد الاجوار بانو سرقلو علوش من المراح في الليل وهز باعو في السوق باش يصرف حقو..ومره اخرة تهمو جارهم عمران باللي هو هبط في الليل على السانيه متاعو وسرقلو الزيتون..ولكن تبين في ما بعد انو ماهو هو هو صاحب العمله .. وبقى عمران حاشم من والد السبتي على العمله وانو اتهم ولدو بالباطل.. الحصيلو السبتي كانت لحمتو طريه وين تقع حاجة يلقى روحو مجبود فيها من دون اولاد الدوار الكل..يمكن لانو تعرف بكونو باندي وما يرشفهاش حتى لحد.. ويمكن لانو زاده يتيم ووالدو في عائلتو الجديدة ..وزيد مشكلة اللقب اللي لصقوهو قلقو وتعبو..لوين قرر نهار من النهارات باش يخرج من الدوار..قال للهم هاني باش نهج يا اللي اودكم بكلهم نظاف اما انا فقط اللي في نظركم موسخ وسارق وباندي وولد المجيره تعيطولي باسم امي. اما ها البلاد نرجعه لها راجل والا انموت ونتدفن البره. وسرى السبتي مع الفجر وما صبحش.. ومن وقتها انقطعت اخبارو. واحد يقول مشى هاجر الى ليبيا ولاخر يقول مشى للدزاير واحد يقول مشى لصفاقس يحوس على خدمة . وكل واحد اش يقول.. لوين تنسى السبتي وما عاد يفكر فيه حد.. السبتي كيف خرج من دوارهم..شد الثنيه لتونس .ركب في الكار وقص تسكره لتونس.. هو ما يعرفهاش من قبل لكن شد صحيح وقال البلاد هاذي ما عادش راجعلها.. يكفي ما تمرمدت وما عيروني وما اتهموني.. فرح والد السبتي بالناس اللي جات تهني فيه بسلامة ولدو وذبح بركوس كبير..وقال الناس الكل الليلة ضيافي.وكل واحد بدا يتحدث على السبتي بطريقتو والناس الكل تجبد كان بالباهب اول واحد تكلم كان جارهم عمران اللى جاب البكوس اللي تذبح بالمناسبة قالهم //الليلة هاذي ليلة عيد كيف جاتنا الاخبار السعيدة على ولدنا واللي احنا ظلمناه ياسر وانا اول واحد ظلمتو..انحب انقول انو السبتي ولدناموش فقط ولد التهامي..وانحبو انقولو للتهامي سامحنا اولادنا موش احسن من ولدك.. والحمد لله هاي جاتنا اخبارو اللي هو عمل في قلبو ولى راجل وسيد الرجال// وكل واحد ما يذكر السبتي كان بالخير والكلام الباهي. تعدات هاك الليلة كانها ليلة عرس. اهل الدوار الكل تلمو في دار والد السبتي و بعد ما تعشات الناس الكل وكلاو الكسكسي واللحم .تكلمسي الشيخ العيد مدب القرية وقالهم هاذي مناسبة عظيمة كيف سمعنا ها الاخبار الطيبة على ولدنا.واللي منا ولينا..ولازم توى نشوفو كيفاش يمشي وفد من الدوار مع والدو يطل عليه..السبتي راهو ولدنا الكل ولو كان ما جاش ولد حلال ما يكونش هو سبب باش نتلمو الكل في ها الليلة المباركة ----------------- وغدا حلقة جديدة من رواية ولد المجيره مع محمود حرشاني
The Asian American Small Business Shopping Guide
Check It Out
