النوري ما هو قلنا يخدم في العدليه..تعرف على مقاول كانت عندو قضيه في المحكمة اللي يخدم فيها..طلب منو كان ينجم يخدم التركي معاه..في شانطي من الشوانط متاعو..قالو راهو خدام وتنجم تعمل عليه. وصحة بدن زاده...ومن غدوة باشر التركي الخدمة عند ها المقاول هذا. في شانطي من الشوانط متاعو.. وفرح بالخدمة.وقال توى زهاتلي الايام..وكان المقاول وين يجي للشانطي يسال على التركي..يقولولو راهو خدام وما شاء الله عليه نهار عيطلو المقاول وبدا يسال فيه..قالو تعرفش من اهلكم واحد عندو بنيه تخدم في دار وتوخذ شهرية باهية التركي اول ما قالو المقاول ها الكلام هذا..فكر في زهره.. وبدا يخمم في طريقة يقنع بيها والد زهرة باش يقبل بنتو تخدم في دار المقاول..قالو توى انشوف هو في الحقيقة كان يحب زهرة تقرب وتجي لتونس المقاول قالو كيف دبرلي بنيه باهية انزيدك في الشهرية .قالو التركي باهي وكيف تجي هي وامها وباباها. قالو انسكنهم في دار صغيره على وجه الفضل وباباها ينجم يخدم معاكم في ا الشانطي والا يتولهالي بالسانيه وامها تنجم زاده تعاونا في الدار روح التركي وهو باش يطير من الفرحة.. قال هاذي فرصة ما تتعاودش انجيب زهرة وامها وباباها بحذايا.هو يعرف اللي والد زهره ليه مده يفركس على خدمة.وادي الهشيم بقعتهم ما فيها شي.لا خدمة لا للكبار ولا اللصغار وبرشه من اماليها خرجو منها مشاو للمدن باش ينجمو يلقاو خدمة يعيشو منها وطلب من المقاول باش يعطيه فلوس باش ينجم يرجع للبلاد ويقنع والد زهرة وامها باش يجو لتونس لانو لقالهم خدمة باهية المقاول بما انو محتاج لبنيه تساعد مرتو في الدار قالوا من غير ما نعطيك فلوس . باش نهزك انا بيدي في سيارتي باش انجمو نقنعو البنيه واهلها وانجيبوهم معانا. قالو التركي خير ما فكرت مالا غدوة نقصدو ربي لدوار وادي الهشيم وما نرجعو كان ومعانا البنيه اللي باش تساعدكم في الدار وامها وباباها زاده بما انك باش تسكنهم في دار وتوفر خدمة لباباها وكيف روح التركي في الليل قال للسبتي اللي هو راجع غدوة للبلاد مع المقاول اللي يخدم معاه .السبتي استغرب من الحكاية هاذي وقالو ماشي باش يجيب خدامة جدد قالو التركيهو في الحقيقة المقاول سي وحيد طلب مني باش انشوفلو على بنيه تخدم في دارو عادانا فكرت في زهره بنت عم حميده وقتلو مع زهره يخدم زاده عم حميده ومرتو. وسي وحيد قبل باش يخدم عم حميدة في السانيه متاعو يتولهالو بيها ويخدم زاده خالتي سعدية زوجتو في الدار كيف سمع السبتي ها الكلام هذا من التركي تتغشش ياسر عليه وقالو اشكون قالك عم حميده يقبل باش تخدم بنتو في الديار والا هو باشيترك دارو في وادي الهشيم ويجي لتونس ..ومن غدوة ..قصد التركي والمقاول دوار وادي الهشيم
The Asian American Small Business Shopping Guide
Check It Out
