كيف وصل السبتي لتونس بعد ما خرج من بلادم.. قرر انو ما عادش يرجعلها وصمم على انو مهما تعب وتمرمد لازم يشد صحيح. وما يرجع للبلاد الا سبتي واحد اخر.. موش السبتيا للي يعيطولو باسم امو.. وموش السبتي اللي يلصقو فيه التهم الكل. اللي عملها واللي ماعملهاش.. قال اشنوى لحمتو طرية. لصق في السبتي وتعدى.وهذاك علاش قرر باش يخرج.يزي ما قاسى وما تعب.واللي قلقو اكثر علاه من دون الناس الكل يعيطولو باسم امو.. اشنوى السر في ها الحكايه.وهذاك علاش مرات يولي شراني ويتحول الى عبد اخر..وخاصة وقت اللي يعيطولو باسم امو.. ولد الموجيره.. مرة من المرات هو متعدي على روحو وزوز اولاد بداو يتهكمو عليهوحسبو ارواحهم يلعبو في الكارطة واحد يقول كول السينكو والاخر يقللو لا نوكل الموجيره ..اي عاد يتفكر كيفاش لحق على واحد منهم وشدو.ونزل عليه ضرب وهو يقول..شد عندك مالا انا الري ولد الموجيرة انا اليوم نوكلك قلبك.. وما فكوه منو كان بالسيف..ولو انو ما حشمش وقتها من المدب اللي قالو سيبو عاد يزيه راهو قضى عليه هو السبتي يجن جنونو كيف واحد يعيطلو ولد المجيره.كان كبف يشد واحد يعطيطلو هكة ما يرحموش..عاد كيف وصل لتونس قال في قرارة نفسو انا هاك البلاد ما عادش راجعلها...الحاجة الوحيده اللي بقات ومتاسف عليه هي شهله بنت الحوانتي اللي متعلق بيها ويحبيها.لكن ما انجمش يصارحها ويقولها راني انحبك. خايف لا تقللو بره عاد ما لقيت ما نحب كان ولد المجيره. وقتها ما يتصورش كيفاش باش يكون رد فعلو. هو كان يتعمد يمر من قدام دارهم باش يراها ويشوفها..ويحاول يتنحنح باش يسمعها ثماش ما تخرج من الباب وتحسب روحها تقضي في قضيه باش تشوفو ويشوفها. في مره من المرات قال لعمتو..اذا كبرت وحبيت تزوجني بمرا من الدوار انا راني انحب شهله بنت عم فرج الحوانتي قاتلو عمتو شهله ضربه وحده. قالها عاد اشبيه .. اش ناقصني على العباد الاخرين والا لانهم يقولولولي ولد المجيره. قاتلو عمتو لا انت راجل وسيد الرجال.. وشهله ماهيش خير منك باش ما ترضاش بيك .قالها يا عمتي انا ما نتزوج وما نوخذ كان شهله والايام شاهده علينا قاتلو .ان شاء الله نفرح بيك وبعرسك قبل منام عيني. وقف السبتي وهو يتذكر كل هذا وهو يشاهد في معلقة متاع فيلم جديد في واجهة مبنى الكوليزي البطله متاعو في التصويره تشبه ياسر لشهلة بنت فرج الحوانتي واللي هو يحبها تذكر اش قال فيها مره شعر وهي متعديه توصل في فطور بابها عم فرج في الحانوت .. .
شهله لبست بالدرة
خطفت عقلي طار البره
خزرتلي كواتني بالنظره
خلتني انتبع في الجره
بدويه وتمشي بالرنه
والكف مخضب بالحنه
تمشي تتبختر تتجلى
واللي يراها يقول اسم الله
والزين بكلو في شهله...
ومن غير ما يشعر.. لقى دموعو تسيل على خدو..انا جيت لتونس وما نرجع للبلاد كان سبتي اخر ونتزوج بشهله.. الفلوس تعمل القيمه للرجال..الراجل ما يعيبو كان جيبو وانا جيبي لازم نعبيه..باش نكبر في عين شهله اللي كل واحديتمنى يناسب عم فرج الحوانتي ويزوج ولدو من بنتو... وراس الموجيره اللي في قبرها ما نتزوج بيها كان انا ..راني السبتي وما ادراك
وغدا الحلقة السادسة من رواية ولد الموجيره تاليف وكتابة محمود الحرشاني في23/01//202......
