..التركي ماهو شلواش بدا يدخل بالشويه بالشويه لقلب المقاول وحيد.. شافو خدام ومندوه.. والتركي من نهار اللي بدا يخدم عندو ..كان يحاول يبينلو انو مطيع لكل اوامرو..كان يحب يتقرب للمقاول وحيد بشتى الطرؤق.. وقت اللي يراه جاي بالسياره يعرضو ويحل باب السياره وبعد ما يهبط منها سي وحيد. يمشي بجنبو حتى لوين الشانطي ومن بعد يرجع باش يمسح السياره من الغبار.. وكيف يشوف سي واحد راجع يجري وياخذ من يدو المحفظة ويمشي بيها حتى للسياره..وسي وحيد بعد ما يركب في السياره .. يقللو شوف يا التركي راني متهني بيك..رد بالك مليح..الخدمة خدمة هو الحقيقة التركي كان يحب يكسب رضا ومحبة سي وحيد وثقتو باش نهار يكلفو بقضيات الدار باش ينجم يكون قريب من زهرة اللي ولات تخدم في الدار هي وامها بعد ما جابهم المقاول من وادي الهشيم وحتى والد زهره كلفو سي وحيد باش يهتم بالسانيه متاعو في مرناق.. لكن سير وحيد رغم ثقتو في التركي ما يحب حد يجيه لدارو الا للضروره القسوى...وحتى الجرده في الدار متولهي بيها والد زهره كيف يروح من السانيه. والتركي بعد ما يكمل الخدمة يروح يبات مع السبتي ولد الموجيره..السبتي اللي ما عادش يحمل تصرفات التركي. وساعه بين اثنين يتخاصمو. السيتي بعد ما خدم مدة في مطعم ما عجبتوش الخدمة كان يعدي نهارو كامل مدفون لداخل يقص في الخضرة ويغسل في الاصحنة وما يكمل من ها الخدمة هاذي الا مع نصف الليل وما يروح الا وما يسيق المطعم.. الحصيلو قرر باش يبطل من ها الخدمة هاذي ويشوف خدمة اخرى.. وفكر باش يعمل نصبه يبيع فيهابعض الملابس وينصب كيف ما تنصب الناس الكل بحذا نهج الدزيره.. لكن راس المال ما عندوش.وفكر باش يطلب من عندو ولد عمكتو الموظف في العدلية باش يعطيه مبلغ صغير يبدا بيه..وفي الليل وهو مع صاحبو الجمعي اللي يخدم عساس في عماره جبدلو على الموضوع وقالو اللي هو يحب يحل نصبه متاع دبش ..قالو الجمعي هاذي فكره هائلة لكن راهي متعبه شويه واعوان البلدية يتعبوك.. وربما يحجزولك السلعه وتخسر كل شي.. الحصيلو السبتي بدا يتعب خاصة بعد ما ترك الخدمة في المطعم..وهو من طبعو عزيز نفس ماهوش لهماق كيف التركي وكيف روح التركي في الليل قالو اشنوى رايك تكلمللي سي وحيد نخدم معاكم .قالو راني نعرفك واطي وما تراش بالجميل وما تحبنيش انكون بحذاك في الخدمة ...لكن هاني باش انشوفك ها المره اش باش تعمل. باش تطلع واطي كيف العادة ونذل والا راجل كيف ما انحبك انا.. قالو التركي شوف يا السبتي يا ولد المجيره.. هو قالو الكلمة هاذي والسبتي شعل وكان يعقل.. وشد التركي وقريب يخرجلو روح.. انت زاده تقللي ولد الموجيره يا هامل.. يا سارح يا ولد السارح.. عاودها . توى ترى اش نعملك.. ورحمة الموجيره الا وما نخرج بروحك.. اش تحساب روحك.. وقتاش لوحت العصا يا هامل باش تتدكك علي انا ..سيدك والتركي يصرخ ويقللو راهي روحي طلعت.. براس شهلة سامحني.وزيد تجبد في شهلة يا هامل..ولولا تدخل سي النوري اللي دخل للدار وقتها راجع من خدمتو راهو السبتي خرجلو بروحو ------------------------------ وغدا الحلقة الجديده من رواية ولد الموجيره تاليف محمود الحرشاني جانفي 2023
The Asian American Small Business Shopping Guide
Check It Out
