اول ما هبط التركي في محطة الكيران متاع باب عليوه لقى السبتي ستنى فيه السبتي عشيرو وصاحبو م الصغره. السبتي هذا هو ولد المجيره..كان في لول يتغشش برشه كيف يعطيولو ولد المجيره ويهبل ..وقداش من مره عمل عركة مع اللي يعطيلو بالاسم هذا وينساو اسمو الحقيقي السبتي..حتى لولاد الصغار وقت اللي يكونوا راجعين من المكتب ويشوفو السبتي جاي عارضهم يبداو يغنيو هاو ا ولد الموجيره هاو ولد المجيره وكيف يجري عليهم السبتي باش يشدهم يهربو عليه اما كيف يشد واحد منهم يوريه الزنباع وين يتباع.. يشد حي يسيبو ميت. تعيطلي ولد المجيره يا كلب.. نسيت روحك يا ولد الهبره والولد يبدا يرغي تحت ايدو بربي سامحني يا عمي السبتي.. وكيف يحن عليه ويسبو هو يبعد شويه وهو يعاود يناديلو يا ولد المجيرة .. يا ولد المجيره..يعاود يجري في جرو لكن ما يشدش .. يا كلب يا هامل يا ولد الهبرة..ما عنديش اسم انا.. راني السبتي وما ادراك وامي اشرف من امك. هو ما يعرفش علاش يقولولو ولد المجيره. حتى التصقت بيه ها التسميه ولاو يعيطولو بيها ونساو اسمو الحقيقي.. في مره من المرات روحو لخالتو متغشش وقال لها توى تقللي علاش يقولولي ولد المجيره.. يا اخي امي اش كانت تخدم..حتى يسموها المجيره من دون النساء الكل..انا نعرف انو اسمها ذهبيه.. قالتلو خالتو.. امطك راهي للات النساء..الله يرحمها.. زين وعين وبهجة وخيال.. ما كانت كيفها حتى مرا في الدوار.. والنساء الكل كانت تغير منها.. لانها كانت اجمل مرا في الدوار قاللها السبتي مالا علاش يقولولها الموجيره..يا اخي امي كانت تبيع في الكارطكة والا فاتحة قربي متاع كارطه باش يسموها بالاسم هذا.. انا نعرف الموجيره ورقة في الكارطه موش اسم مرا.. يلزمني نعرف قصة ها التسميه يا خالتي.. وعلاش كانوا يقولولها الموجيره وما يعيطولهاش باسمها ذهبيه.. كيف النساء الكل ..لازم ثمة قصة نحب تقولهالي يا خالتي.. وكيف يلح عليها تقوللو ايجي نهار وانقلك علىها اما امك راهي شريفه وعفيفه.. ما خلتلكش ما تستعار منو.. السبتي كان يعرف اللي امو ماتت على بكري..وبوه كيف ماتت امو تزوج مره اخرى.. والسبتي كيف ما نجحش في قرايتو وحس روحو كبر شويه. جاء لتونس ومن وقتها ما رجعش للبلاد حتى نساوه الناس ويحسابوه ماتت والا هاجر الى ليبيا وانقطعت اخبارو.. وحتى باباه ما كانش يسال عليه وكبرت عليه العائلة الجديدة..لكن كان ديمه يقول السبتي ما ماتش والحي يروج لوين نهار هو قاعد في الحانوت وقدامو براد التاي .جاء شخص غريب على الدوار وسال على بو السبتي قالو خير ان شاء الله انا هو..قالو الضيف ما تخافش جبتلك خبر سعيد انا صاحب السبتي ولدك اللي عندك سنين ما ريتوش. شهق شهقه واحده وقرب يموت لو كان ما سبوش عليه الماء..قالو بعد ما فاق احنا نحسابوه مات ما عندنا عليه حتى خبر من وقت اللي خرج من الدوار..قالو يا سيدي ولدك لباس عليه.. راجل وسيد الرجال وهو اللي طلب مني باش انجيك وانخبرك اللي هو حي يرزق ومن نهار اللي جاء لتونس. صحيح تعب شويه وتمرمد ولكن هو حاليا يحمد ربي ويشكرو..تعرفت عليه وانا بيدي جيت لتونس من ولايه اخرى ودخلتو المرة الاولى يخدم معابا في شانطي مقاول..وكنا نسكنو في بيت وفرهالنا ها المقالول هذا يرحم والديه..ومن بعد ولى السبتي يخدم في مطعم.. وتو عندو اكثر من عامين مستقر يخدم في قهوه .القهوة هاذي قهوة مضخمة القهوة فيها بهاك الحساب..والسبتي قاد روحو ويصور في الخير والبركة.من البوربوار بركة يصور الخير والبركه. وزيد انقلك تعرف على زميلتو اللي تخدم معاه في القهوة.. بنيه هائلة تعمل الكيف...
The Asian American Small Business Shopping Guide
Check It Out
